كل ما يخص كلية طب اسنان
#كلية_طب_الأسنان
نظام الدراسة:
أسنان 5 سنين + سنة امتياز في كل الجامعات بس تقسيمهم بيختلف..
بمعنى أن في جامعات:
- أول سنة اعدادي وبيدرسوا فيها مواد من علوم زي كيميا وفيزيا وحيوان وأوقات تشريح ضفادع (زي اسكندرية وطنطا والمنصورة وسينا)
- من أول سنة بيدرسوا مواد أسنان عادي من غير مواد علوم.
وأيا كان تصنيف جامعتك من الاتنين، ف بتاخدوا مادة او اتنين من طب بشړي بشكل بسيط مش بتوسع، زي التشريح، بس خاص بالأسنان ف مادة اسمها "Dental Anatomy" ودي بتدرس فيها بالتفصيل تركيب كل سِنَّة.
في السنين اللي بعد كده بتكون دراستك متخصصة أكتر ممكن تدرس مواد من بشړي بس المعظم من أسنان زي في تانية وتالتة، وفي رابعة وخامسة بتدرس الجراحة والتقويم والجذور واللثة.
العملي:
معاك في السكاشن من أول سنة:
▪️لو عندك اعدادي بيكون تجارب فيزيا وكيميا وتشريح ضفادع.
▪️عملي أسنان في أول سنة شغل (أو لعب🥳) بالشمع وتسييح وتعمل مودلز للسنان كلها بمقاساتها وحاجة لعب ومتعة للصبح يعني بس ممكن يبوظ منك ف الآخر وتعيده تاني 🤭😂💔
تاني وتالت سنة العملي فيها بأدوات تانية بتعمل تركيبات وشكل الفك كله بأيدك.
من رابع سنة بتبدأ تشتغل مع الpatients عملي في الكلية وتنزل عيادات، تعملهم حشو وتركيبات وغيره.
وبعد ما بتخلص بيكون عندك امتياز بتشتغل فيه ف الكلية، وبعد كدا ممكن تبدأ شغل خاص بيك في عيادات مثلاً تحت رقابة وزارة الصحة.
الشغل بعد التخرج:
بعد ما بتتخرج تقدر تشتغل ف عيادات طب الأسنان المتعارف عليها، من خلع وتركيب وغيره، بس في مجالات متوسعة أكتر تقدر تشتغل فيها، زي:
- مجال من مجالات طب الأسنان زي: جراحة الوجة والفكين، طب أسنان الأطفال وتقويم الأسنان والفكين وغيره.. (سواء هتشتغل ف عيادة مع دكتور تاني، أو هتفتح عيادتك الخاصة)
- تحضير ماجستير وتكمل دراسات عليا.
- تجميل الفم والأسنان (التبييض والتركيب وغيره)
- تاخد كورسات تجميل وتشتغل ف مراكز تجميل الأسنان dental care centers.
- عيادات طب الاسنان للأطفال بما إنهم بيخافوا جدا فبتكون دي عيادات مخصصة ليهم بيكون فيها حاجات بتجذب الأطفال زي شاشات عرض كارتون أو تشجعهم بهدايا وهكذا
وبس كدا .. بالتوفيق للجميع ❤️
