كل ما يخص كلية التمريض

اصغر شويه كلنا بنلف فى دايره واحده وبنكمل بعض .
الكلية مستقبلها كويس جدا لانك بتتخرج و تشتغل علي طول وتتثبت في شغل تبع الحكومه دا غير انك ممكن تنزل تشتغل او تتدرب وانت بتدرس عادي في اي مستشفي خاصه .
طيب نيجي لبعد التخرج وبعد التكليف 
هنلاقي ناس بتقف لحد هنا وتقولك انا شغال وبقبض وفيه ناس مش هتكتفي بكدا وهتكمل 
والناس ال بتكمل ديه بيقي قدامها مليون سكه والتانيه تكمل فيها  
اخبار_التعليم_لحظة_بلحظة
أولا الماجستير والدكتوراه 
بيكون في أي تخصص من تخصصات المواد التمريضية اللي درستها في الكلية بشرط أن تقديرك في مادة التخصص ما يقلش عن جيد .
الدكتوراه درجة علمية أعلى من الماجستير بتقدم لها لو ربنا وفقك واخدت الماجستير .
ثانيا الزمالات و دي دراسة بتعملها لما تخلص الكلية و اغلبها بيبقى مدتها ٣ سنين .
زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر
information technology جوه في المستشفي
زمالة الإرواء القلبي و دي بتتخرج منها أخصائي إرواء القلب ودا بيقي موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس .
وفيه زمالات تانيه زي زماله الاطفال والتخدير 
بس زمالة التخدير واقفه فى مصر بس شغاله برا فى امريكا لو حد هيسافر ممكن ياخدها من هناك وهيبقى اخصائي تخدير بس مبقتش موجوده فى مصر للأسف
ثالثا الدبلومات ودى اغلبها بيبقى مدة دراستها سنه .
دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه .. والموضوع ده حلو جدا و مرتبه اعلى من العام علشان الناس اللى حابه التمريض العسكرى .
دبلومة الجودة بعد ما بتحصل عليها بتبقى أخصائي جودة تطبق سياسات الجودة في المستشفى يعني مش هتتعامل مع المرضى نهائيا .
دبلومة الإدارة لما بتاخدها بيكون ليك الاحقيه في المناصب الإدارية بالمستشفى زي مثلا رئيس التمريض بالمستشفى بتختصر الدبلومة دي ليك الوقت وممكن تصل بيها لمدير مستشفى كمان .
دبلومة مكافحة العدوى مدتها سنة ونصف وبتكون أخصائي ثاني مكافحة عدوى وبعد شغلك سنتين في المجال بتبقى أخصائي أول مكافحة عدوى وعملك انك تتأكد أن كل اللي في المستشفى بيطبقوا نظام وسياسة مكافحة العدوى وساعات العمل فيها بتبقى من 8 الصبح ل 2 .
ده كله طبعا غير ان التمريض مطلوب فى العالم كله ففرصتك فى السفر كبيره وبره مصر التمريض واخد وضعه جدا وهى المهنه رقم واحد فى الدول المتقدمه وخريج الكليه بيبقى ليه الأولويه فى السفر وفرصه اكتر بس مش معنى كده ان خريجين المعهد او المدرسه مش بيسافروا لا دول بيسافروا برده بس فرصهم اقل .
وبشكل عام الكليه دى من اكتر الكليات الي ليها مجالات شغل مش زي ما احنا فاكرين نهائي فمحدش يستقل بيها .
وبإذن الله إذا أخدت قرارك ودخلت الكلية دي لازم تقدر قيمتك وقيمة العمل ال بتعمله و الموضوع مش سهل أوي ولا صعب مستحيل لا هو ممكن جدا بالمجهود والسعى .
وطبعا انا مكلمتكوش على الثواب اللى ورا المهنه دى وكمية الدعوات اللى بتلاقيها من المرضى لما تعملهم حاجه تخفف عنهم
وبس كده
ده اغلب التفاصيل عنها